काठमाडौं । पछिल्लो समय हास्यव्यंग्य टेलिचलचित्र डिठ्ठा साबमा अभिनय गर्दागर्दै अष्टेलिया पुगेका कलाकार करण श्रेष्ठ क्रेजीको दैनिकी अहिले अष्ट्रेलिया तिर नै बितिरहेको छ । उनको व्यस्तता अहिले पनि सुटिङमा बितिरहेको छ । अष्ट्रेलिया भ्रमणको मौकामा कलाकार करणले डिठ्ठा साब र एक म्युजिक भिडियोको सुटिङ अष्ट्रेलियामा गर्न भ्याए । कान्तिपुर टेलिभिजनबाट प्रसारण भईरहेको हास्य व्यंग्य टेलिचलचित्र डिठ्ठा साबको सुटिङ उनकै पहलमा अहिले अष्टेलियामा भईरहेको छ ।
अष्टेलियामा रहेका नेपालीहरुलाई समेत उनले उक्त टेलिचलचित्रमा अभिनय गराईरहेका छन् । निर्माता तथा वितरक समेत रहेका करण क्रेजी अहिले कलाकारितामा जमिरहेका छन् । करिब डेढ महिना अघि फिल्म फेस्टिबल कार्यक्रममा सहभागी हुन पुगेका करणले एक म्युजिक भिडियोमा समेत अभिनय गरेका छन् ।
गायिका निशा देशारको स्वरमा सजिएको “मनभरि तानाबाना” बोलको गीतको भिडियोमा उनले अभिनय गरेका छन् । उनलाई साथ दिएकी छिन् रमिला अधिकारीले । गीतमा मोडल रमिलासँग करणलाई रोमान्स गराएका छन् निर्देशक मनोज अधिकारीले । यस गीतको भिडियो अष्ट्रेलियाका विभिन्न ठाउँहरुमा खिचिएको निर्देशक अधिकारीले बताएका छन् । गीतको म्युजिक भिडियोलाई श्री पराजुलीले खिचेका हुन् । ‘गुमनाम’ एल्बमको यो गीतमा गैरे सुरेशको संगीत र प्रदिप चापागाईको शब्द रहेको छ ।
नेपाली फिल्म जवाफबाट कलाकारिता क्षेत्रमा प्रवेश गरेका करण क्रेजीले दुई दर्जन भन्दा बढी फिल्महरुमा अभिनय गरिसकेका छन् । अभिनय क्षेत्रमै आफ्नो जीवन समर्पित गर्ने चाहना रहेको बताउने कलाकार क्रेजी यो क्षेत्रमा अझ धेरै काम गर्न बाँकी रहेको बताउँछन् । उनी भन्छन्, “म जहाँ गएपनि मेरो कलाकारिता त्यहीँ हुने गर्दछ । तर म कलाकारिताबाट भागेर कहिल्यै विदेश पलायन चाहिँ हुँदिन ।” आफ्नो यो अष्ट्रेलिया भ्रमण दोस्रो पटक भएको उनले बताए । केहि बाकी छायांकनको काम सकेपछि नेपाल फर्किने तयारी गरेका क्रेजीले कलाकारितालाई थप सक्रियताका साथ निरन्तरता दिने कुरा समेत बताए ।